मुंबई (गुरुदत्त वाकदेकर) : टाटा आपीएल २०२२ चा पंचेचाळीसावा सामना दिल्ली कॅपिटल्स विरुद्ध लखनौ सुपर जायंट्स यांच्यात मुंबईच्या वानखेडे स्टेडियमवर खेळवण्यात आला. लखनौ सुपर जायंट्सने ६ धावांनी हा सामना जिंकला. लखनौ सुपर जायंट्सने नाणेफेकीचा कौल जिंकून प्रथम फलंदाजी स्वीकारली.
लखनौ सुपर जायंट्सकडून कर्णधार के. एल. राहुलने सर्वाधिक धावा काढल्या. त्याने ४ चौकार आणि ५ षटकार यांच्या सहाय्याने ५१ चेंडूंत ७७ धावा काढल्या. त्याला शार्दुल ठाकूरने बाद केले. दीपक हुडाने ६ चौकार आणि १ षटकार यांच्या सहाय्याने ३४ चेंडूंत ५२ धावा काढल्या. त्याला शार्दुल ठाकूरने स्वतःच्याच गोलंदाजीवर झेलबाद केले. क्विंटन डी कॉकने ३ चौकार आणि १ षटकार यांच्या सहाय्याने १३ चेंडूंत २३ धावा काढल्या. त्याला शार्दुल ठाकूरने बाद केले. मार्कस स्टॉइनिसने बिनबाद १७ धावा काढल्या. शार्दुल ठाकूरने ४-०-४०-३ गडी बाद केले. लखनौ सुपर जायंट्सने १९५/३ असा धावांचा भलामोठा डोंगर उभा केला.
यह भी देखें: टाटा आयपीएल – चेन्नईने १३ धावांनी सामना जिंकला
प्रत्युत्तरादाखल दिल्ली कॅपिटल्सकडून कर्णधार ऋषभ पंतने ७ चौकार आणि १ षटकार यांच्या सहाय्याने ३० चेंडूंत ४४ धावा काढल्या. त्याचा मोहसीन खानने त्रिफाळा उध्वस्त केला. अक्षर पटेलने शेवटपर्यंत चिवटपणे झुंज दिली. त्याने १ चौकार आणि ३ षटकार यांच्या सहाय्याने २४ चेंडूंत बिनबाद ४२ धावा काढल्या. त्याने सामन्याच्या शेवटच्या षटकात दोन षटकार मारले पण ३ चेंडूंवर एकही धाव न काढल्याने दिल्लीला हाती आलेला सामना गमावावा लागला. मिशेल मार्शने प्रत्येकी ३ चौकार आणि षटकारांच्या सहाय्याने ३७ धावा काढल्या. त्याला कृष्णाप्पा गौथमने बाद केले. रॉवमन पॉवेलने ३ चौकार आणि २ षटकार यांच्या सहाय्याने २१ चेंडूंत बिनबाद ३५ धावा काढल्या. त्याला मोहसीन खानने बाद केले. कुलदीप यादवने बिनबाद १६ धावा काढल्या. पण दिल्लीला ६ धावांनी पराभव स्वीकारावा लागला. मोहसीन खानने १६/४, कृष्णाप्पा गौथमने २३/१, रवी बिश्नोईने २८/१, दुष्षमंथा चमिराने ४४/१ गडी बाद केले.
मोहसीन खानला सर्वोत्कृष्ट खेळाडू पुरस्काराने सन्मानीत करण्यात आले. त्याने १६/४ महत्त्वपूर्ण गडी बाद केले होते.
